Македонскиот премиер очекува на 20-ти или 21-ви ноември да се одржи првата средба меѓу преговарачите од Македонија и Грција со посредникот на Обединетите нации во решавањето на спорот со името, Метју Нимиц, потврди во понеделникот претседателот на владата Зоран Заев одговарајќи на новинарско прашање по средбата со словенечкиот премиер Миро Церар.
Заев зборуваше за натамошниот тек на европските и евроатлантските интеграции на Македонија, при што напомена дека во таа насока, во прв ред, фокусот се става во решавањето на спорот со Грција.
„Ова е навистина актуелно прашање и во Македонија. Логично беше по завршувањето на локалните избори да се направи нов обид за решавање на овој суштествен или чувствителен проблем, којшто го има Република Грција со нашето уставно име, а кој истовремено е пречка за нашите интегративни процеси. Процесите веќе почнуваат, на 20-ти или 21-ви ноември очекуваме да се направи првата средба помеѓу преговарачите од двете земји со медијаторот Метју Нимиц“, рече Заев.
Истакна и дека овој месец се очекува интензивирање на преговорите.
„Ние, во Македонија, се обидуваме да изградиме национален консензус, сите, претседателот на државата, Владата, опозицијата, но во функција на наоѓање решение, а не на негово одложување“, нагласи Заев.
Посочи дека Македонија гради пријателски односи со Грција и изрази уверување дека во таква пријателска атмосфера може да се најде решение и на ова, како што истакна, горливо прашање.
