Вицепремиерката и шефицата на бугарската дипломатија Екатерина Захариева денеска во Софија го прими министерот за надворешни работи на Македонија, Бујар Османи, по што објави дека следната недела започнуваат со работа билатералните комисии кои произлегоа од Договорот за добрососедство од 2017.
Ова е прва средба на ниво на министри за надворешни работи откако мешовитите историски комисии престанаа да работат по избивањето на корона-кризата, а Бугарија во меѓувреме постави услови да се даде зелено светло за започнување на преговори на Скопје со ЕУ.
– Оваа посета го враќа политичкиот дијалог по долга пауза. Имаше избори и COVID-19. Да се врати духот на пријателство и добрососедство. Ние се покажавме сите овие години како добар сосед и пријател. Идните генерации нема да ни простат. Мора да се вратиме на договореното од 2017 година, рече Екатерина Захариева.
Таа дополни дека патот е поврзан со многу реформи, исполнување на критериумите но и на внимавање на националната позиција на Бугарија.
– Не сакам да дозволам атмосферата во медиумите да влијае на оваа средба. Соседите преку патот на реформите мора да бидат членки на ЕУ. Имаме време, не многу, двете комисии ќе се состанат следната недела по пауза од речиси една година, додаде Захариева.
