Ние сме во една долга криза која е блиску да кулминира, рече во вторникот вечерта пратеникот од владејачкото мнозинство Ферид Мухиќ во емисијата „Само вистина“ на тлевизијата Канал 5, а во врска со прашањето во однос на уставното име на Република Македонија.
Според него, македонската позиција е изразена и упатена да биде кооперативна. Мухиќ, исто така, рече дека македонскиот интегритет е доведен сериозно во прашање, а Македонија е изложена на една деидентификација, деисторизација, како и одземање на достоинството.
„Сите сме изложени на тој притисок. Ние можеме да покажеме многу повеќе интегритет. Некои од договорите се асиметрични не се градени на реципроцитет. Изненадувачки, според мене, е колку поединци немаат глас. Ова е првпат во историјата, преседан, никогаш и ниту еден освојувач да бара промена на името од една држава. Притисокот е на целата држава. Нѐ уценуваат. Дај го името, па ќе го добиеш ова. Тоа е корупција, тоа е најниско ниво“, рече Мухиќ.
„Не само што е апсолутен преседан да се бара промена на името, туку ерга омнес. Тоа е правно бесмислено. Како е можно една страна да диктира на друга држава како да бара обврзување да регулира начин на односите со трети држави. Понижувачки е да се каже бараа Грците од нас да смениме име, па, еве, мораме да го смениме. Ние немаме спор со Грција. Ние не бараме ништо од нив. Затоа не треба да отстапуваме. Не прифаќам апсолутно промена на името“, дециден беше Мухиќ.
Професорот додава дека и да се претпостави дека Македонија ќе влезе наредната година во ЕУ, ќе се влезе како некој што е понижен и што го плукнал своето име. Според него цената е превисока, а срамот ќе биде поголем да се добие но посочува дека за жал преговорите ќе продолжат и дека Нимиц медијаторот во овој спор е во право и дека прашањето за името ќе се реши.
