Во последниот натпревар од четвртото коло на француското фудbалско првенство, Олимпик Марсеј и Лил одиграа без победник 1:1.
Гостите од Лил поведоа во 47 минута преку Лиуз Аро, а за Марсеј израмни Валер Жермен во 85 минута.
Марсеј првенството го отвори со две гостински победи, од кои првата на „Паркот на принцевите“ над актуелниот шампион ПСЖ со 1:0, но во следните два домашни настапа освои само еден бод. Вечерва ремизираше против Лил, а минатото коло на својот „Велодром“ по 41 година беше поразен од Сен Етјен.
По трите последователни победи Сен Етјен одигра 2:2 на гостувањето кај Нант. Гостите водеа со 2:0 и се чинеше дека ќе дојдат и до четвртата победа во низа на почетокот од шампионатот, но Нант во последните 20 минути успеа да израмни.
За домашните стрелци беа Мозес Симон во 71 и Рено Емон во 85 минута, додека за Сен Етјен погодија Адил Аушиш во 2 и Иван Масон во 66 минута.
Монпелје беше убедлив против Анже победувајќи со 4:1. Стрелци за домашните кои ја постигнаа и третата победа сезонава беа Суке во 18, Делор во 43 и 60 и Моле во 86 минута, додека почесниот погодок за гостите го постигна Баокен во 25 минута.
Во дербито на дното Стразбур со 1:0 го победи Дижон, а стрелец беше Стефан Митровиќ во 80 минута. Ова се превите бодови за Стразбур сезонава, а Дижон останува без бодови.
Првата победа ја впиша и Мец со 2:1 над Ремс. Двоен стрелец за домашните беше Ибраим Ниане кој првиот гол го постигна во 18 а победонисниот во 88 минута, откако Доа во 43 минута израмни од пенал.
ПСЖ во претходно одиграниот натпревар на кој не настапи казнетиот Нејмар, на гости кај Ница славеше со 3:0. Головите ги постигнаа Килиан Мбапе во 38 минута од пенал, Анхел ди Марија во првата минтуа од судиското продолжение на првото полувреме и Маркињос во 67 минута.
Со тоа играчите на ПСЖ барем малку го поправија лошиот впечаток по двата стартни пораза од по 0:1 од Марсеј и од Ленс, и од големото бламирање на својот „Парк на принцовите“ минатата седмица кога во финишот на дуелот со Марсеј предизвикаа мешаница чиј зачетник беше Нејмар во која им беа доделени три црвени картона.
Во саботата Ленс ја забележа третата победа во низа, откако дома со 2:1 го совлада Бордо, додека Рен дома со пресврт во последните десет минути го совлада Монако со 2:1.
На табелата водат Сен Етјен и Рен со по 10 бодови.
